Delhi, Jymmang 06 : Katkum ka mat treikam jong ka Election Commission of India (ECI) ban plie lad ia ka jingshai bad ban pynskhem ia ka jingkut jingmut jong ka ban don ka kam jied nongmihkhmat kaba bha tam napdeng ki ri ba don ka synshar paidbah, 75 ngut ki delegate na 23 tylli ki ri ki don ha India ban sakhi ia ka General Election jong ka India kum shi bynta jong ka International Election Visitors’ Programme (IEVP).

Ka prokram mynta ka sngi ka dei kaba la plie paidbah ha ka jingiadon lang u CEC Rajiv Kumar bad ki EC Gyanesh Kumar bad Sukhbir Singh Sandhu ha New Delhi.

U Chief Election Commissioner, Rajiv Kumar ha ka jingai jingkren ia ki delegate, u la ong ba ka kam jied nongmihkhmat jong ka India bad ka kam ba la trei da ka Election Commission of India, ki don ka bynta kaba khraw ha ki kam synshar paidbah jong ka pyrthei.

Ha kaba iadei bad ka rukom treikam bad ka bor treikam ba ka wanrah, lah ban ong ba ka ‘jingiohnong ka kam synshar paidbah’ kaba khraw bha ha ki jinglong jingman ba don ki jingkhuslai shaphang ka jinghiar ki kam synshar paidbah ha ka pyrthei.

U Kumar u la ong ba ka kam jied nongmihkhmat ha India ka long kaba kyrpang, namar ka jingkyntiew kyrteng bad ka jingthep vote kam dei kaba ki briew kim lah ban kiar. Kumta, ka ECI ka donkam ban treikam ha ka rukom kaba pynshlur ia ki briew, ban khring ia ki ba kin long kumba trei mon sngewbha ban long shi bynta ka electoral roll bad kumta, lyngba ka prokram ai jingtip ia ki nongjied nongmihkhmat, pynshlur ia ki ba kin leit thep vote. U la ong, “Ngi lah ban ong ba ka jingiaid ryntih jong ka kam ba ngi leh ka paw lyngba ka jingbun ki briew kiba wan iashim bynta ha ka jingjied nongmihkhmat bad ka jingdap jong ki electoral roll ha kaba iadei bad ka Elector-population ratio.”

Ha kaba iadei bad ka jingiar jong ka kam jied nongmihkhmat ha India, u la ong ba 970 million ngut ki nongjied nongmihkhmat ki dei ki ban pdiang sngewbha da 15 million ngut ki nongtrei ha ka kam jied nongmihkhmat ha palat 1 million tylli ki Polling Station kiba don ha kylleng ka ri. U Kumar u la ong ba ka jingiar jong ki nongjied nongmihkhmat jong ka ri ka dei kaba ki delegate ki lah ban iohi ha ki Polling Station. U la ong shuh shuh ba ka India ka dei ka ri jong ki tamasa bad u la khot sngewbha ia ki delegate ba kin sakhi hi ia ka tamasa jong ka synshar paidbah.

U Commissioner u la iakren ruh bad ki Chief Election Commissioner jong ka Kazakhstan, Uzbekistan bad Nepal ha ryngkat ki kynhun jong ki.

Ha shuwa kane baroh, la ai jingtip ia ki delegate shaphang ki bynta bapher bapher jong ka General Election 2024 jong ka India ba kynthup ia ki EVM-VVPAT, sienjam IT, ka bynta jong ka media bad ka social media. Ia kane ka jingai jingtip la pyniaid da u Senior Deputy Election Commissioner, Dharmendra Sharma bad ka la kynthup ia ka jingbatai shaphang ka kam jied nongmihkhmat da u R.K. Gupta, Deputy Election Commissioner bad la bud ia kane da ka presentation shaphang ki EVM-VVPAT da u Nitesh Kumar, Sr. Deputy Election Commissioner. Ka la don ka presentation shaphang ki sienjam IT jong ka ECI da ka Neeta Verma, Director General (IT) bad ka Media bad social media da u Anuj Chandak, Joint Director (Media).

Ia ki delegate yn phiah ha ki kynhun bad kin leit jngoh ia ka Maharashtra, Goa, Gujarat, Karnataka, Madhya Pradesh bad Uttar Pradesh ban peit ia ka jingjied nongmihkhmat bad ki kam kiba iadei bad ki jingpynkhreh ha ki konstituensi bapher bapher. Kane ka prokram kan kut ha ka 9 tarik u Jymmang, 2024. Ka prokram kan ai jingtip ia ki EMB delegate nabar ri shaphang ki jinglong jingman jong ka rukom pynlong jingjied nongmihkhmat ka India bad ki rukom treikam ba biang tam jong ka India ha kaba iadei bad kane.

Mynta u snem, katkum ka jingiar bad ka jingkongsan jong ka Lok Sabha Election 2024 kaba dang iaid shakhmat, ka kynhun kaba heh tam jong ki nongmihkhmat jong ki Election Management Body (EMB) bad ki kynhun na 23 tylli ki ri ba kynthup ka Bhutan, Mongolia, Australia, Madagascar, Fiji, Kyrgyz Republic, Russia, Moldova, Tunisia, Seychelles, Cambodia, Nepal, The Philippines, Sri Lanka, Zimbabwe, Bangladesh, Kazakhstan, Georgia, Chile, Uzbekistan, Maldives, Papua New Guinea bad Namibia ki iashim bynta ha kane ka prokram. Ki dkhot na ka International Foundation for Electoral Systems (IFES), bad ka kynhun media na Bhutan bad Israel ki la iashim bynta lang.