Shillong, Kyllalyngkot 29 : Ka kynhun ialehkai phutbol jong ka Meghalaya watla ka la shah tam da ar kol, hynrei ka la lah ban wanphai sha ka jingiakhun ban pynliem ia ka Jharkhand da 5-3 ban ioh rung sha ka final jong ka Khelo India Youth Games 2024 (Boys) ha Tamilnadu hynne ka Lah sngi U Blei ka 29 tarik u Kyllalyngkot, 2024.

       U Mebanlamlynti Marsharing marwei u la ioh thep saw kol ban ioh khur artad ia ka hattrik ka jong u ha kane ka jingiakhun ia ka semifinal jong ka Khelo India Youth Games.

       Kane ka dei ruh ka sien banyngkong ia ka Meghalaya ba kan ioh rung sha ka final ha ka Khelo India Youth Games.

      Ha kane ka jingialehkai u nongkren ne commentator u la iaroh jur ia u Mebanlamlynti ia kaba u la pyniasyriem ia u bad u Sunil Chetri bad u la pynpaw ruh ba une u Mebanlamlynti u dei u khlur ialehkai phutbol ban sa wan jong ka India.

      Na ka liang u coach Jeffrey Warlarpih u la pynpaw ia ka jingsngewsarong kaba khraw ba ka kynhun ka la lah ban ialehkai bha watla ka la shah tam da ar kol, bad u la iaroh ia ki khynnah ba ki la ialehkai kum ka kynhun bad u sngewthikna ba ha kane ka kynti kin ioh ban rah ia trophy.

      U la pynpaw ruh ia ka jingsngewkmen ba dei tang ka discipline football ba ka Meghalaya ka la shah jied ban iakhun ha ka Khelo India Youth Games, hynrei kiwei ki discipline kim shym la shah jied satia, bad kaba sngewsarong ka long ba ki la ioh rung sha ka final ban pynthikna ban ioh ia ka takma.