Mawkyrwat, Jymmang 02: Ka jingjah noh jong uwei u samla uba kyrteng u Shanborlang Lyngdoh (27 snem) na ka shnong Mawlangwir, 1 KM na Mawkyrwat, South West Khasi Hills District naduh ka 26 tarik u Lber, 2024 ha kaba haduh mynta ym pat ioh khubor eiei shaei u don, ka la pynsngewsih kthang ia la kajong ka kmie ba pun ba kha, ka Kong Lotilda Lyngdoh bad kumjuh ruh ia ki bahaiing hasem.

Ka jingjah jong une u samla ka la pynkhuslai ruh ia ki bor pyniaid shnong jong ka Mawlangwir bad kumjuh ruh ia ki bor pyniaid shnong jong ka shnong Mawsain, kaba dei ka shnong jong ka kurim jong u, kong Pynhunlang Mylliem. Baroh ar tylli ki bor pyniaid shnong jong kine ki ar tylli ki shnong ki la sah ha ka umdum khamtam hadien ba ki la pyrshang ban wad ia u kylleng ki jaka bad pyntip ruh sha ki bor pulit bad kumjuh ki lad pathai khubor. 

Haba ai jingkren ha ki nongthoh khubor ha Mawlangwir hadien ka jingiakynduhlang hapdeng ki bahaiing hasem u Shanborlang ryngkat ki nongialam shnong ka Mawlangwir bad Mawsain, u Myntri ka shnong Mawlangwir, u bah N.S. Wanniang, u la iathuh ba na ka liang jong ki bahaiing bad ka shnong ki la pyrshang katba don la ka buit ka bor da kaba la pyntip ruh wat ha ki bor pulit bad buh jingkyrpad lyngba ki lad pathai khubor ia ki briew ba kin ai jingtip lada ki tip ne iohi ia u Shanborlang, hynrei haduh mynta ki don hapdeng ka jinglynga jingpisa namar kim tip eiei shano u don, la u leit bylla ne u leit shaei ym don ba tip bad teng teng ki la don ruh ka jingpyrkhat sniew ioh lehse la jia kaei kaei kaba sniew ia u. 

Na ka liang jong u Secretary ka shnong Mawsain, u bah R.Snaitang, u la iathuh ba ka shnong Mawsain bad ki paitbah shnong baroh mar ia ioh jingtip halor ka jingjah u Shanborlang, ki la shimkhia da kaba ki la pyrshang ban wad jingtip shane shatai hynrei kim ioh jingtip eiei haei u don. Kkumta u la kyrpad biang ruh ia baroh ki paitbah nongshong shnong jong ka shnong Mawsain ba lada ki don jingtip ne iohsngew shaphang u Shanborlang kin sngewbha ban pyntip lem sha ki bahaiing hasem.

Ka kmie u Shanborlang, ka Kong Lotilda Lyngdoh ha ryngkat ka jingjaw ummat kthang ka la kyrpad ia la ujong u khun ba un wanphai noh sha iing namar ba baroh ki bahaiing hasem ki la sngewsih kthang. “Lada me don hangno hangno, sngewbha wanphai noh sha iing namar ngi la lynga bad ngi la pisa ka mynsiem ba mynta la shi bnai tam me la jah na iing bad lada phone ruh ngim ioh shuh. Lada me iohi ia kane ka jingkren jong nga, sngewbha wanphai noh sha iing ne iathuh haei me don,” la ong ka Kong Lotilda, kaba la kyrpad ruh ia ki lok ki jor bad ki briew kiba iohi ne tip shaphang u Shanborlang ba kin sngewbha ban pyntip lem lyngba kine ki number phone 8787428772 / 8787832956 / 9366835012 / 9485146567.