Shillong Jymmang 06 : Ka iing trep ri khyllung kaba la ai kyrteng ka Trep i Mei, kaba don ha shnong Lawshlem, kaba hap ha Mawphlang C&RD Block, East Khasi Hills ka la ktik ia ki briew kylleng ka ri India ha ka social media, wat ia ka dkhot ka National Commission for Women (NCW) kaba dei na kane hi ka jylla Meghalaya kaba la leit iuhkjat syndon haduh ba don kane ka jaka.

Ia kane ka iing trep la shna hi ki longkmie kane ka shnong kiba dei ki dkhot jong ka Iatreilang Village Organization, Lawshlem, ryngkat ka jingai jingmut ka Iarailang Cluster Level Federation (CLF).

      Kane ka trep la shna ban pynshong, ban buh ia ki khunlung katba ki kmie ki dang trei ha lyngkha.

Ia kane ka trep kaba shna da ka dur iing Khasi, la tap bad ker da u traw, phlang ryngkat ka jaka thiah kawei, ka jaka shong hapoh. Ka iing ka dei kaba rit hynrei kaba tngen pat, ha kaba ki kmie ki wanrah ia ki khun rit ha katei ka jaka ban peit kiba la kham san bad ialade ki leit trei ha lyngkha.

Ka dkhot ka National Commission for Women ka kong Delina Khongdup ka la ong ba ka la shah ktik, ban wan jngoh kyrpang ia kane ka trep hadien ba ka la iohi lyngba ka social media.

Ka kong Delina ka la ong ba ka dei ka jingsdang kaba rit eh bad ka nuksa ban pyni sha ka pyrthei khamtam ba ki Khasi ki shim ia ka jinglong jait na ka kmie. Ha kane ka trep, ki kmie ki lah ban ialam ia ki khun bad ban lait na u slap, ka sngi, na ka lyer.  

Ka la ong ba ka NCW ka ngeit ba ka jingpynkup bor ia ki kynthei ka long kaba donkam ha baroh ki liang bad kane ka jaka buh khunlung ka long shi bynta kaba ai mynsiem, bad kaba iaid katkum ka jingthmu ka NCW.

Ka la ong ba lyngba ka NCW, kan iakren ban thaw lad lyngba ka National Crèche Scheme ba kin lah ban aplai, khnang ban pynjanai shuh ia kane ka trep.

Ka kong Deline ka la iakren iasyllok ruh bad ki dkhot ki nongialam kane ka ka Iatreilang Village Organization, Lawshlem, kiba ia poi lang khrui ha kane ka sngi.

Ka secretary ka Iatreilang Village Organization, Lawshlem, ka kong Twissida Khyriem ka la iathuh ba la shna ia kane ka trep da ka jingai jingmut na ka CLF, bad la shna ha u Nohprah 2023 bad la lah ban pyndep 3 sngi, da kaba iamih baroh ki dkhot para longkmie. Ka la ong ba mynshwa, ki shem jingeh ban rah khun sha lyngkha bym don nongpeit hynrei naduh ba don kane ka trep, kila sngew hun ka mynsiem ban buh ia ki khun ryngkat ki nongpeit, katba ialade ki leit ban lur lyngkha da ka jinghun mynsiem.

Kumjuh ka kong Wansiewdor Marbaniang na ka Iarailang CLF, ka la ong ba ka CLF ka la shu ai jingmut, ai jingkyrshan hynrei ia ki kam, la leh bad la shna hi ki dkhot ka Village Organisation ka shnong Lawshlem. Ka jingthmu jong kane, ka long ba ki khun ki dei ban biang ka rukom ai bam, ka por thiah, ka jingai buin bad kiwei kiwei.