Shillong Jymmang 06: Namar ka jingtih beain ia ki marpoh khyndew bad ka jingpom pathar ia ki dieng, ka rilum Garo ka la mad jingeh jingeh ha ka jinglong jingman jong ka mariang.

Katkum ki kaiphod, ka rilum Garo kala mad ia ka jinghiar ha ka jingdon ki dieng bad ki khlaw kiba rben namar ka jingtih be-ain ia u dewiong kaba la pynjulor ia kiba bun ki jaka bad ka la ktah ia ka jinglong jingman jong ki sawdong sawkun ka mei mariang kaba ialam ruh sha ka jingtyrkhong ki tyllong um.

"Ka jingpynjulor ia ki khlaw ki btap kala ktah jur ia ki tyllong um, ki wahduid bad ki wah kila sdang ban rngad, ha kaba ka imlang sahlang kala duh noh ban ioh ia ka um kaba khuid ba suba ban dih. Kane kam dei tang ka mat kaba ktah ia ka mei mariang hynrei ka dei ka jingeh kaba khraw ia u khun bynriew” ong u Cherian Momin uba dei u nongtrei sngewbha.

U Cherian Momin u nongtrei mon sngewbha, ula kyntu ia ka sorkar jylla ba kan buh hakhmat eh ban pynneh pynsah iaka jinglong jingman ka mei mariang ha rilum Garo bad ban shim ia ki rai kiba kongsan ha kaba iadei bad ka jingkylla ka suinbneng.

U Momin u la ong ba jingkylla ka jinglong jingman ha ka rilum Garo kadei tang namar ka jingpom pathar ia ki dieng ki siej bad ka jingtih be-ain ia ki mar poh khyndew kala pynjulor ia ka mei mariang bad ia ki um ki wah.

"Ka jinglong jingman ka suinbneng kam dei kaba dang jngai, hynrei kala wan jia mynta bad kala ktah ia ngi baroh” ula ong bad ka bynrap  

"Ka jinglong jingman ka mei mariang ha rilum Garo ka long kaba kyrkhai hynrei ia kane la pynjulor noh da ki riewkhwan myntoi shimet. Kadei ka por ba ngin shim kyrkieh ia ki sienjam ban iada ia ka mei mariang bad ia ka pateng”.

Ula ong nalor ka jingkyrduh um, ki nongrep kila hap ban iaid bad ban im ryngkat bad ka jingkylla ka suinbneng, ka jingslap ka bym biang bad ka jingshit kyrang kala buh ha ka jingma kaba khraw ia ka kamai kajih ka jongki. Bun kila mad ia ka jingduhnong na ka jingbym mih thikna ki jingthung jingtep bad kane kala buh ha ka jingeh ia ki ha kaban ioh ia ka kamai kajih.

"Ka jinglong jingman ha rilum Garo ka long kaba ma, hynrei kam pat dei pat kaba slem ban leh eiei noh” ula ong bad ka bynrap “Ngi donkam ba ka sorkar kan leh eiei kyrkieh noh mynta ban tehlakam ia ka jingtih be-ain ia ki marpoh khyndew bad ban pyntreikam ia ki aiñ ban iada ia ka mariang. Ngi donkam ruh ban bei tyngka ha ki kam ki jam ban iada bad ban pynneh pynsah ia ki khlaw ki btap bad ia ki tyllong um na ka bynta ki pateng ban dang wan”, u la ong.