Shillong Jymmang 06: Ki jaidbynriew Kuki-Zo kiba shong basah ha kylleng jong ka nongbah Shillong kila rakhe ia ka “Awakening Day” ha ka 3 tarik u Jymmang, kum ka dak ban kynmaw ia ka jingdap shi snem jong ka jingiakynad hapdeng ki Kuki bad ki Meitei ha kaba palat spah ngut kila duh iala ka jingim bad iala ki jingdon jingem na katei ka jingiakynad.  

Ka Kuki Inpi Meghalaya bad Kuki Students Organisation, Shillong kila pynlong ia katei ka Awakening Day ha Kuki Worship Service, Church Complex, Lumbatngen, Madanryting, Shillong ha kaba kila niew ia ka 3 tarik u Jymmang 2023 kadei ka sngi kaba la sdang ka jingaikyand kym ka Awakening Day.

Haba aiingkren haka jingialang u President ka Kuki Inpi Meghalaya S Touthang, ula pynkynmaw ha ka jingialang ba ha ka shi snem jong katei ka jingiakynad, kila don 185 ngut ki Kuki-Zo kiba la duh iala ka jingim, 200 tylli ki shnong bad 7,000 tylli ki iing kila shah pynjulor lut bad palat 360 tylli ki jaka mane Blei kiba kynthup ia ki iingmane kila shah wiangding.

Ula ong, ba kane ka jingiakynad kala lam ruh sha ka jingduh ia ki jaka shong jaka ia palat 40,000 ngut ki briew kiba don ha ki palat 200 tylli ki Relief Camp bad palat 100 tylli ki skul kiba dei ki jongki jaidbynriew Kuki-Zo kila shah pynjulor bad shah pynjot na katei ka jingiakynad.

U President ka Kuki Inpi Meghalaya ula ai jingbatai ruh shaphang ka jingthaw ia ki Buffer Zone ne u pud u sam hapoh jong ka jylla Manipur na ka bynta ki ar tylli ki kynhun da u Myntri Kam Pohiing ka ri kadei kaei kaei ka bym lah ban poi pyrkhat bad ka long ka jingpdiang jong ka Sorkar India hi, ba ki Meitei bad ki Kuki kim lah ban ia imlang ne sahlang shuh.

Ula batai bniah ia ka jingdonkam ban iada ia ka Buffer Zone kaba la thaw da u Myntri Kam Pohiing ka ri bad ula kyntu ia baroh ki Kuki-Zo ban iatylli lang kawei ban lah ban pynurlong ia ka jingthmu ha kaba iadei bad ka kam saiñpyrthei da kaba ai nuksa ban ioh noh iala ka jongka bor synshar ne Separate Administration na ka sorkar kaba phaikhmat sha ki Meitei kaban long hapoh jong ka riti synshar jong ka ri India bad ula banjur ia ka jingdonkam ban long kiba husiar bad ban iada ia khyndew bad ban batskhem ia la ka jinglong tynrai bad ban iengskhem ha ka nongrim jong ka jaidbynriew.

Ha kane ka jingialang la wan iashimbynta da ki nongialam na ka jaidbynriew Kuki-Zo kiba kynthup ia ki Kuki, Mizo, Hmar, Paite, Vaiphei, Gangte, Zou, Simte, Tidim-Chin bad kiwei kiwei bad da ki hajar ngut ki jaidbynriew Kuki-Zo kiba shong basah ha kylleng jongka nongbah Shillong bad la pynkut pat da kaba pynlong ia ka jingthang mombati kaba lamkhmat da ka Kuki Students’ Organisation Shillong kum ka dak ban kynmaw burom ia ki mynsiem jongki Kuki-Zo kiba la khlad noh.